Wiekupwur Lap nan Pwungen Media oh Focal Point en Wehi 14 nan Pacific

 

Regional Pacific NDC Hub patohwen katanga doadoahk en Focal Point Meeting nan wein Fiji ni August 30 lel September 1, 2023. Oh oaralap en wiekupwur lap wet ketihtihki ni patohn wai, “A Climate Resilient Pacific: NDC Targets and the Way Forward”, me kak kawehwehdi ong ni mahsen en Pohnpei, “Deke kan nan Pacific en kakehng kiewek en nan wehwe: iei me NDC kin loaloapwoatieng koadoakoadoahke sang met patohla mwowe”. 

Regional Pacific NDC Hub - de pali ieu me pato pahn epwel kaweid en Government en wein Germany, Australia, New Zealand, oh European Union - patohwen katanga doadoahk en Focal Point Meeting oh Media Dialogue, me iei wiekupwur lap ieu me kihpene weliepen ohpis de focal point en wehi 14 nan Pacific me pil ni ansouwohte wia semen kei ong palien climate change, irail partner de kempoakepahn wehi pwukat, donor kan de irail akan me sawas ong tehte oh wiepen doadoahk kesempwal akan me anahn ong wiekupwur lap wet, oh pil iangahki irail weliepen media de journalist en wehi pwukat. Duwen me sansal sang Pacific NDC Hub, kemwekid lap wet doke mehlel en NDC ah tungoal kairoir oh project kesempwal akan me pweidahr nan pahr 2023. E pil niansouwohte sair wiepe kan me pahn kak sawas ong ni pilahnepen, kamwahulahn oh pil keirdahn doadoahk kesempwal kan me pidada epwelpen climate change nan wehi kan en Pacific. 

Irail akan me iang towehda wiekupwur wet patohwen ehupene nan patpatopene ieu me mweidehng irail pwukat ansou mwahu en patohwanda iren kahpwal akan me climate change patohwandohnger kisin deke kan, wehi tikitik kan, kousoan akan, oh pil sahpw laud akan nan lepinsed wet. Re pil tungoalenki ansou mwahu en sapankipene arail tungoal iren madamadau kan ong epwelpe kan me konehng kamanamanla pwehn kak apwalih oh katikala climate change. Ehupene wet pil sewese katehlapahla wehwe me pali pwukat tungoalenki me pidada Paris Agreement de kosonned lap me kokouda sang United Nations ong ni epwelpen climate change nan wehi kan en sampah oh ninduwen me pil kasansansalada sang Regional Pacific NDC Hub Steering Committee Chair Debra Sungi, wiepe wet kihpene wehi pwukat pwe ren wiahla ehu ni arail pahn kin ehukipene soahng kan me irail koaros kin sohsohpai. 

Ih pwukoah me keieu kesempwal de sikilahsang koaros iei kitail en kak sawaspene kolokol oh apwahpwalih sapwellimatail tiahk, wasahn kousoan kan oh wiepen kepikipik kan me wia soaretail. E patohwan me wiekupwur wet pil niansouwohte kalipwe ehupenehn doadoahk me mie nan pwungen wehi kan en Pacific ong dahnge kan me pahn mwahu ong irail dih en mwuhr kan. Patehngete met, media dialogue session de wiekupwur tohrohr ieu pil wiawi nan pwungen irail journalist kan en wehi kan me sansalehr. Oh met pil wiawi pwehn kapehse kesempwalpen media nan soangen irair akan me duwehte climate change. Pwehki media ah wia piris ieu nan pwungen government oh tohn community de wehi, iei me elehda arail iang patehng wiekupwur wet. 

Niansouwohte, media kin sohpai soangen challenge de iren kahpwal ekei nan ansoun report ki climate change - me rasehng: souitar en information de rohng, sawas oh utuht sang government oh pil niansouwohte sohdokpene me kin pwarada nan pwungen irail oh focal point kan. Oh re patohwen patehng wie kupwur wet pwe ren pil wehkada de sakarkihda mwohn weliepen government oh focal point kan mwomwen pwukoah me re pahkihieng wehi nan palien information. Pwehki ire wet, ABC Fiji Reporter Lice Movono patohwen weliandi pwihn en media oh kasalehda me media wiahte journalist kei kaidehn activist de semen kei ong palien climate change oh pwehki met, pekipek oh koangoang pil wiawihieng irail focal point de weliepen government kan me pato nan wiekupwur wet ren kupwur kalahngan sawas - sewesehda palien media oh mweidiraillong nan wasa kan me re konehng lel ie pwe ren kak patohwanda ong tohn wehi dahme mehlel oh pwung oh dahme udahn wiwiawi nan Pacific rahn pwukat me tohn wehi konehng mwahngih. 

Regional Pacific NDC Hub Project Manager Iris Cordelia Rotzoll patohwan, “Focal Point Meeting oh Media Dialogue wet pil wia tapwin sapwellimatail doadoahk lap en kahkowei mwowe oh koadoahkehda wehi ieu me pahn kehlail oh keirda mwahu ong nan pahr akan me pahn patohdo. Oh sang ni ehupene wet, kitail pil pohnesehkipene soangen kahpwal akan me kitail, sapwellimatail wehi, oh kousoan akan kin sohpaikipene rahn koaros. Oh pil niansouwohte, kitail pil dehdehkihier iahnge wiepe kan me kitail konehng doadoahngki de idawen pwehn kak sewesei kitail nan sapwellimatail doadoahk en pelian kahpwal akan me climate change patohwandohng kitailehr”.

Ni oaralap, doadoahk en ehupene me wiawihier nan wein Fiji pil wia platform de ansou mwahu ong pali koaros en saledek mahmahsenkipene kahpwal en climate change kan me miehier oh pil duwen iren sapwellimen ehu ehu wehi project de doadoahk kan ong ni epwelpen kahpwal pwukat oh soangen sawas da me anahn. Oh wehi 14 kan me iang patehng wiekupwur wet iei me iangahki: Fiji, Cook Islands, Kiribati, Nauru, Niue, Palau, Papua New Guinea, Republic of the Marshall Islands (RMI), Samoa, Solomon Islands, Tonga, Tuvalu, Vanuatu, oh Federated States of Micronesia (FSM).